"Schuälweg" per Velo

Juhui, ha mir ä Velo kauft. Isch das herrlich mit dem umädsdüsä. Ha mittlerwilä au schu vili Schlichweg gfunde und ein Teil vo mim "Schuälweg" isch entlang vom Yarra river, bevor s denn so richtig in Stadtverkehr goht. Wenn i chli Gas gibe han i für diä rund 12km öppä glich lang wiä vo Hus zu Hus mit OeV. A propos Schuäl, d Lea het mi gfroget in welli Klass i denn geng ;-) do a dr Melbourne Uni hets recht viel älteri Studente, au söttigi wo mit 50i na ä PhD machen, me het niä usglernt. Na zu mim Velokauf, am letschtä Fritig wer i ebä anstatt i dr Uni fascht im Spitol glandet, ha würkli Glück ka. Do bin i na mitem alte usgliehene Göppel alias Hengscht (Sab et al.) umägrösslet, wo ebä bi Nässi d Bremse nümä tuä hend. Item, s Melbourne isch dr Velostreife döt wo au d Auto parkieren, und do me do links fahrt stiegen d Autofahrer rechts usem Auto us. Do chum i doch so ds fahre und eng uf dr Site vo de parkierende Auto will rechts Tram und Auto fahren und i dem Moment stiegt eini zu ihrem Auto us und i han grad na chünä uf Tramschiene uswiche, es isch zum Glück kei Tram umägsi. Uff, do han i gfunde, i sött mir doch vilicht au na äs sicherers Velo chaufe, s Problem isch jetzt meh, dass i mit dem schneller unterwegs bi. D Autofahrer sind sich do nid gwohnt, dass es Velofahrer umä het, das isch chli ds gföhrlich am Velofahre i dr Stadt, me cha sich nid uf diä verloh dass sie au chli ufmerksam sin. Jä nu, nüt passiert und ich ha huärä Freud an mim neue Göppel, mit dem i hoffentli im November cha uf Tasmanien in d Velofeiri. Wer Luscht het mitdschu isch herzlich iglade ;-) Wüschä eu ä guätä Wuchästart und freu mi immer vu eu ds ghörä! See you Luzia

PS: d Marianne, mit ihre wo i an Osterä gu zeltä bi kapituliärt und bricht ds Studium ab, aber zum Glück blibt sie glich, sie het ja au zahlt, aber macht eifach ds Praktikum nid. Glücklicherwis bin i do di neutral Schwizerin und im Sportphysiomaster, wos nid ganz so hierarchisch zuä und her gout. In dr Klass isch recht ä schlechti Stimmig, will di meischtä so under Stress und Druck sin. Eini a dr andere isch am hülä (also do sin d Mane ja würkli gschieder) und denn gits na Intrige, äs isch wiä im Kindergarten! Bi würkli froh chum i ä bitz äwäg und cha mini eige Strategie fahre (hoffe sie goht uf, aber bi zuäversichtlich ;-) na ja, es isch halt schu nid ganz so eifach, winn me eigentlich als Physio zum Teil behandlet würd wiä me na im erschtä Johr vo dr Physiousbildig wer...glücklicherwis chum i mit dem eigentlich ganz guät ds Schlag und ha mi au uf das igschtellt.